الحبيب الجبالي مزاودي جربة الأولاني

خلالي توة أيامات في تشات بوكس متع أصوات و سبل شخص رسالة مفادها الي يحبني نقول كليمة على المغني الشعبي الحبيب الجبالي أناالحق متع ربي مانيش من هواة غناء السيد هذا وزيد كان عندي موقف من الأعراس اللي كان يحييها والي عادة تكمل بطريح خنفيري بين الحوم وبين أولاد العم الي كونو تحت تأثير السحنتي التقليدي وإلا العصري. لمكنتي في السنين لخرة بديت نهتم بهالضاهرة والكلمة ما هيش كبيرة على زعيم أولاد سيدي جمور الحبيب الجبالي على خاطر شعبيتو ضاربة أطنابها في جربة وفي جهة الجنوب الشرقي عموما وحتى في العاصمة إلي نتفكر كلما يغني في الزهراء يعبي المسرح جمهور الجبالي متنوع بالمناسبة الجبالي يغني عندو توة زايد مالعشرين سنة تلقى فيه الكبار بصغارهم و الشباب الطالبي و الخدام و النساء بكل أطيافها الحاجة اللي تخلي كل الحشد يتجند للمحافل إلي فيها حبوب هو ما غير شك الطابع الخاص لغناء الجبالي إلي عادة ما يكون الربارتوار متعو من تأليفو سينون الصوت متع الجبالي ما ريت ما يزيد على برشة مزاودية والأداء الركحي متع خافت برشة لا فيه لا رقص لا شيء شوية تنقيز على شوية دوران و كهو تبقى قوة الجبالي في الكلام الجربي الي يستعملو في شعرو وعلى ما يبدو إلي مرأة من أجيم ألفتهولو كلام فيه برشة صدق و برشة واقعية وما فيهش كان مشاكل الحب والعشق بركة وفيها حاجات تهم مشاكل أهالي الجزيرة من مرض وغرقان في البحر وفيها زادة شهادات على ناس خدمو الجزيرة كما الطبيب الأكثر شهرة عند الجرابة بولكباش إلي داوى برشة مرضى وتصدى للدواء الرعواني بقوة تقول مطلع غناية الجبالي

يعز عليا بولكباش يعز عليا

دوالي ولدي غاليا بولكباش

الحبيب وعملا بالسنة الحميدة متع التوريث حط ولدو في بلاصطو و ولى التعربين توة على الجبالي جنيور فمة حاجة أخرى حبيت نختم بيها اللبسة متع الجبالي إلي فيها برشة من اللباس التقليدي الليبي ولقب الجبالي دايور يتعطى في جربة لتسمية سكان أصيلي جبل نفوسة وحتى سحنات الجبالي فيها برشة من الأشقاء اللبيين