برنامج فكر إسلامي في التلفزة التونسية

تفرجت انبارح في الليل في برنامج حواري على قناتنا الوطنية شدوأرواحكم مليح إسمو فكر اسلامي البرنامج تعدى بعد دليلك ملك و ما فمة حتى إشارة ليه في الموقع متاع تونس سبعة مما يؤكد حطانو في أخر لحظة موضوع الحلقةسوفت شوية على خاطر ما فماش فيه برشة إختلاف إذا ما فيهش إختلاف جملة الموضوع هو بر الوالدين ويضهرلي الجماعة متاع البرنامج تجاوبو مع حادثة قضائية حكت عليها الصباح الجمعة لفاتت و تتمثل في قضية قام بيها بو عمرو ثمانين سنة ضد ولدو إلي حسب ما فهمت استحوذ على أملاك والدو و خلاه تر فر. لحقيقة متاع ربي ما نجمتش انركز على البرنامج على كانت العائلة ملمومة و برشة حس وعلى خاطر اطرلي وقتلي نشوف واحد يحكي و ما نعرش شكونو وكإنوبشماتة المخرج ما خسرش علينا كلمتين يعرفنا بالسيدات و السادة الي يهدرو عرفت في المقابل المذيعة العاقلة و المتربية برشة ألفة الشرقي إلي لا تحبش و لا دبش ديما تضحك و ديما موافقة و فهمت إلي فمة متدخل يحاجج بمتن ديني وفمة متدخل يحاجج بمتن سوسيولوجي أما ازوز سيدات الحق متاع ربي ما سمعهمش فاش يحكو ولمكنتي عرفت إلي هوما موافقين خاصة مع تحريك روسهم بطريقة عمودية ما نعرش علاش إختيار هلعنوان لبرنامج و هل ترى باش يواضبوعليه و الا لا ؟