الله غالب قنديل باب منارة ما يضوي كان عل البراني

الله غالب قالها مرة بوتفليقة كسألوه صحافيين على الجملة المعبرة إلي ينجم إزيدها لعلم الشقيقة الجزائر كما عمل المرحوم صدام حسين على علم العراق وكتب الله أكبر ونفس الجملة نحب نقولها فخصوص التخرنين و العرق الجريدي و يسمحوني أهلنا في الجريد الكلمة إستعملها خونا عماد حبيب إلي مرة أخرى ما حرق شعيرو كان ثقافة الكره الي يبث فيها خونا طارق ربي يهديه ولا كليمة على الفديو شافو ولا ما شفوش هذا موش مربط الفرس إلي بيه الفايدة إنها فرصة مواتية باش ما يعدهلوش ويفكروالي هو شدد قول و الزلقة بفلقة و أنا واحد من ناس نتفهم الغضب متاع طارق و غيرتو على بلادو وحتى النعوت إلي إستعملها فمة ما أحرف منها في الفديو ن نوع نعتنابنية عمرها 18 سنة بالسم وإلا الخدامة بالأوباش و بالمناسبة نحب نقول لسي عماد لوغتو الثانية فيها برشة كلام يحشم ويزينا من نعت لغتنا بالعهر . نختلف مع طارق في حكاية العقلية لإستعمارية متاع الفرنسيس إلي كانت مازلت فمة فعند جماعة العمر الثالث فمة عقلية ثقافية متع مهيمن و يعرف طارق بلقدى الي باحثين أمريكان في الأثار خدمو في جربة و إشكاو طلبتنا التوانسة إلي خدمو معاهم منهالعقلية. حبيت نقول زادة لطارق إلي التعميم في الدارجة يتم وقتلي الإسم يكون معرف و النعت موش معرف . حكاية الميز العنصري في فرنسا فيها برشة مبالغة و برشة مزايدات سياسية الفرنسيس العادين كيفي وكيفك غاطسين في هم الدنيا وما يهمهم كان مشاكلهم متاع كل يوم و فيهم برشة يحسوبالغبن على خاطر قفزوعليهم لمريكان ولنقليز وهكا علاش الخطاب الوطني ماشي هليمات. ثقافةالكره فكرتني في حديث حكيت فيه مرة مع زياد من جربة عمناول قلتلو فيه الي الفرحة متاعومبالغ فيها فخصوص بيعان الرفال في مونوبري في تونس جاوبني قلي خطابك يحث على الكره... حبيت زادة نتفاعل مع عماد في حكاية السكة هلي شدو فيها المتباكيين على

الإستعمار و إنجازتوا الشعب التونسي بنى مدارس خمس مرات قد لبناتو فرنسا في خمس سنين و كانك على الطرقات فرنسا ما عملتهمش لسواد عنينا و بربي ماعدش تقارنلي الأندلس بفرنسا وكانا أحنا التوانسة من سلالة عبد الرحمان الد اخل وإلاأولاد طارق بن زياد وإذا الوسادة غلبت الولادة ما عليك يا صاحبي كان تتنعم برفاهية العلمانية و سيب صالح من هدرة نشرنهاعلى خاطر تحرث في سبخة. الله غالب الخطاب لحكيتو مازل كسمعتو من فم محمد صيفاوي و من الشعبوني ومن برشة فرنكوفيل و إلي عادة ما يتقززو منهم العامة العرب و الخاصة الفرنسيس.