نكون شنوة في اللعبة الشنوية

استدعاوني الأخوين برباش وفري رايس بش نشارك في اللعبة الشنوية اللي قاعدة تدور بين المدونين وهاني بش نشارك في هاللعبة

كان جاء عندي اختيار بش نكون شجرة من دون شك زيتونة زلماتي عروقها ثابتين وورقها ديما خضر وزيتونها زراسي وزيتهامنو نضوح صافي دواء وشفاء ومن خشبها نعملو مردومة فحم ومن ورقها صريع قوت زوايل .

كان كنت ماكلة كسكسي مسفوف بالقديد و الوزف بالطازيا و الكراث مع كاس لبن من نهج غانا.

لو كنت زهرة زهر البرتقان ريحة ترد الروح وتطير السخانة من الراس.

لو كنت دشرة قلالة قرية مدينة لمت برشة تاريخ من لغة و صنعة قديمة الي هي الفخار وفيها جامعا بوموسور وين الصلاة عندها خشوعها وخصوصيتها الاباضية زيد عليهم بحرها الرائع بجنب جامع سيدي ياتي.

اما اذا كنت قصيدة فاني نختار اجمل حب لمحمود درويش

كما ينبت الحب بين مفاصل صخر وجدنا غريبين معا

وكانت سماء الربيع تؤلف نجما ونجما

وكنت اؤلف فقرة حب لعينيك غنيتها

لو كنت شخصية تاريخية بدون تردد نختار عمر بن الخطاب الفاروق رمز لعدل والنفس لمطمئنة

لو كنت شخصية اسطورية اوليس البحار الي تضرب في اللوتس متع جربة.

لو كنت واد نهر النيل وهو يشق في البلدان ويتبلنج في المتوسط برغم من تعب الرحلة.

لوكنت شخصية قصصية بطل رواية اللجنة لصنع الله ابراهيم الصبر عندو بالحق مفتاح الفرج وقتلي قريت الرواية حبيت اكثر البحث الاكاديمي.

لو كنت حيوان نحلة تؤمن بالعمل و الدحيس

كان جيت صياغة خلال بسكري جربي.

لو كنت لباس كدرون جربي ابيض بكبايتو.

اذا كنت ريحة فاني نخير نكون ريحة التوابل في المرشي سنترال.

لو كنت موقع سور الصين العظيم طول بلغلة.

العقبة لطارق الكحلاوي و المحافظ و الشنفرة ومريم وقصة على الخط و ماد جربة