متفرقات

نحب نبدا بلتعبير عن تضامني مع المدون عمروش الي تعرض لعملية مصادرة غبية ماليها حتى معنى بما انها ما تزيد كان اشهار للمعلومة المصنصرة و زيد الي يسرق يغلب الي حاحي
الجمعة الفايتة جتني دعوة للانضمام الى مجموعة ضد ما يطلق على تسميتو عن جهل وقلة حياء مازقري وهو مصطلح عنصري لتوصيف التوانسة اللي من اصول غير جربية و الي غالبا ما يكون من عمال الحضائر هالدعوة الي جتني عل فايسبوك فيها برشة اشخاص نعرفهم ما يفرقوش بين حبهم لجزيرتهم والعنصرية او الجهوية البغيضة الي عبرو عليها بمجموعة مريضة كما الي وضعها
حبينا توة شهر التالي نستخرجو بطاقة ناخب من القنصلية التونسية بباريس فكانت المفاجاة وقتلي جاوبنا عون الاستقبال الي التاريخ فاتنا وقالنا بالمناسبة انا انتخبات 2014 نعرف الي اعوان ادارتنا يحب الضمار وفهمت الي احنا عندنا رؤية استشرافية في انتخابتنا والي كما مدرسة الغد وجمهورية الغد مانيش بش نطمع كان في انتخابات الغد
بالمناسبة توة مازال تفصلنا اشهر معدودة عن الاستحقاق الانتخابي ومازال ما شفنا حتى شي من تعبئة حتى افتراضية لمنافسي الرئيس الحالي شنية البرامج المقترحة وشنية الانتقادات الجوهرية في ما يخص ميادين استراتجية كما التعليم والصحة والاقتصادالي على خاطرها قاعدين يعارضو في الحكومة الحالية
نحب نختم بملاحظة تخص كتاب فتحي بالحاج يحي الي طلع بالمناسبة ولد الاديب الجربي سي الجيلاني الي يذكرو بالخير هدا توة سنوات مكتبتو للمكتبة العمومية بميدون الكتاب الي يتنشر في نفس الوقت مع كتاب جلبار النقاشا عملت في صغرك يحكي على تجربة الحبس اللي تعرضلها الكاتب بسبب انتماؤ لمنضمة العامل التونسي اليسارية الكتاب فيه برشة تجرد انساني وبرشة خفة روح بالرغم من مرارة وبؤس اعنف الي تعرضلو الكاتب على ايدي جلاديه برشة تفاصيل تهم البلاد ككل وقع الاشارة ليها في كتاب بالحاج يحي الي ما يلزمش ينسى الي ماساة الحبس من اجل الافكارمتغلغلة في تونس ما بعدالاستقلال والي اليسار خرج منها باقل الاضرار لانو متواجد في الساحة يعبر و يتعبر من قبل تاس من فيه كمابرهان بسيس في حين برشة يوسفيين و اسلاميين ما لقاوش حتى السميق حتى بش يسترزقو بيه